Sastra Lisan

MITOS NGUNIKAKAE KLAKSON ING PAKUBURAN

(desa Tambaksari, kecamatan Kuwarasan, kabupaten Kebumen)

Ing desa Tambaksari, kecamatan Kuwarasan, kabupaten Kebumen, ana sawijining pakuburan kang diprecaya angker dening warga kana. Pakuburan iku mapane ana ing pinggir dalan Tambaksari-Purwaganda, luwih tepate ana ing sakulone SD N Tambaksari. Miturut kaprecayan warga kana, menawa arep liwat pakuburan iku, saben wong kang nunggang motor kudu ngonekake klakson. Merga menawa ora ngonekake klakson diprecaya wong iku bakale nemoni apes. Apa maneh sering ana kadadean kacilakan ing sakiwa tengene pakuburan iku, dadi warga kana sansaya precaya marang mitos iku. Ora mung warga Tambaksari, warga desa liya uga melu precaya marang mitos iku.

Wong kang liwat ing kuburan kuwi jarene uga akeh kang diweruhi dedemit utawa memedi. Salah saijining wong kang tau diweruhi yaiku bakul bakso saka desa lia. Nalika ngiderake dagangane iku, dheweke diweruhi wong wadon rambute dhawa nganggo klambi putih, banjur dheweke mlayu merga saking wedine. Ana uga wong kang lagi nunggang motor, dheweke ora ngonekake klakson, banjur dheweke diboncengi kuntilanak.

Kang nambah nggawe angker, kadangkala ana wong kang menehi sesajen ana ing salah sijining kuburan. Sesajen iku kanggo arwahe para leluhur supaya urip tentrem ing alame. Sanajan wis akeh kadadeyan kang ganjil kaya mau iku, nanging ana uga wong kang ora precaya lan nganggep wong iku musyrik. Wong pancen nduweni hak dhewe-dhewe. Precaya ora precaya sing penting kudu bisa njaga awake dhewe-dhewe.